Şəhidlərimizi
anırıq
Film kimi bir
ömür
8 oktyabr 2020-ci il idi.
Suvagil kəndində ikinci şəhidi torpağa tapşırırdıq. İlk şəhid də bu kəndə gəlmişdi,
Elvin Qədirov. Onda da kənd belə izdihamlı idi. Dəfndə iştirak etmək üçün
rayonun hər tərəfindən insanlar axın-axın gəlirdilər. Məzarlığa doğru uzanan
yol insan seli ilə dolu idi. Döyüşlərə getməyənlər sanki bu yolla vətənə sədaqətlərini,
şəhid ruhuna hörmət və ehtiramını ifadə
etməyə çalışırdı. Fəqan haqqında, onun igidliyi haqqında hələlik heç nə
bilmirdik. Biz bilmirdik ki, necə qəhrəman, şücaətli bir oğulu torpağa
tapşırırıq. Günlər sonra onun haqqında ilk məlumatı sosial şəbəkələrdən alırıq.
Bu bir qəhrəmanlıq dastanı yazan igidimiz imiş. Fəqanın qısa, lakin şərəfli
ömür yoluna nəzər salaq.
1998-ci ildə anadan olan
Fəqan Məmmədovun atası Vahid birinci Qarabağ müharibəsinin iştirakçısı olub. Bu
sadə ailədə 3 uşaq böyüyüb. Fəqan və iki bacısı. Fəqan elə balacalığından hər kəsdən
seçilərdi. Film izləməyi sevər, dostları ilə ancaq filmləri müzakirə edərdi.
Dostları hətta zarafatla deyərdilər,-ay Fəqan, deyəsən sən Hollivuda gedəcəksən.
Fəqan Hollivuda getmədi, İncəsənət Universitetinin kinoşünaslıq fakultəsinə qəbul
olundu. Bu fakultəni uğurla bitirdi. Arzuları sonsuz idi. Qəlbi quş tək uçur, xəyalında
arzularının çələngini hörürdü. Lakin əsgəri borcunu verməli idi. O tələbə
dostlarına demişdi, xidməti başa vuran kimi işə başlayacağam. Hər kəs məndən
yaxşı rol almaq üçün növbəyə düzüləcək.
27 sentyabr 2020-ci ildə,
müharibə başlayanda Fəqan cəmi 4 ay idi əsgəri xidmətdə idi. Alagözlü bir el
qızı da onun yolunu gözləyirdi. Əsgəri xidmətini başa vuran kimi evlənəcəyinə
söz vermişdi. Cəbhədə qızğın döyüşlər gedirdi. Artıq yetəri qədər şəhidimiz var
idi. Düşmənə qan udduran əsgərlərimiz ən müasir döyüş taktikasından ustufadə
edirdi. Fəqangilin bölüyü də üzbəüz döyüşdə idi. Xain düşmən öz məğlubiyyətini
örtbasdır etmək üçün Gəncəyə, Tərtərə, Bərdəyə və digər yaşayış yerlərinə
qadağan olunmuş silahlardan atəş açırdı. Oktyabrın 6-da Ağdam istiqamətində
döyüşdə Fəqan şəhid olur. Oktyabrın 8-də onu doğulub boya-başa çatdığı Suvagil
kəndində dəfn etdik. Bu dəfn mərasimi adi mərasim deyildi. Sanki insanların birliyinin,
düşmənə nifrətinin, qəzəbinin təcəssümü idi,
şəhidin ruhuna dərin ehtiram idi. Minlərlə insan şəhidi sanki qəbristana
deyil haqq evinə, əbədiyyət evinə yola salırdı. Fəqanın nə kimi bir iğidlik
göstərməsini isə ertəsi gün onun ölümdən qurtardığı döyüşçü dostlarının sosial
şəbəkədə yazdıqları kiçik hekayədən biləcəkdik.
Dostları yazırdılar:-“Biz
erməniləri pusquya sala bildik. Bu vaxtı onlar ağ bayraq qaldırdılar. Buna
inanaraq silahı endirdik və irəliyə getdik. Bu vaxtı onlar üstümüzə qumbara
atdılar. Hər şey bir anda baş verdi. Fəqan bizləri itələyərək qumbaranın üstünə
yatdı. Və şəhid oldu.”
Bu adi şəhidlik deyildi.
Belə qərarı vermək üçün gərək yüksək insani keyfiyyətlərə yiyələnmiş olasan. Bu
bir gəncin bir neçə insanı yaşatmaq naminə özünə verdiyi ölüm hökmünün
elegiyası idi. Bu onun qəlbindəki Xocalı hayqırtısı, şəhidlərin intiqamı üçün
çırpınan qəlbinin son döyüntüsü idi. Fəqan o anda Qarabağ döyüşlərinin ən gözəl
səhifələrindən birini yazdı. Onun bu hərəkəti xalqın qəhrəmanlıq tarixini yenilədi.
Fəqanın ali məktəb müəllimi, məşhur kinoşünas
Ayaz Salayev telekanalların birində öz düşüncələrini belə ifadə etdi:-“Fəqan
milliyyətcə saxur idi, mənim ən yaxşı və ən istedadlı tələbəm idi. O, dünya
kinosunun təlqin etdiyi xeyirxahlığı, humanizmi, bəşəri dəyərləri dərindən əxs
etmişdi. O Stenli Kubrik, Andrey Tarkovski, Akira Kurosava, Federiko Fellini,
Antonio Banderas kimi ünlü kinorejissorlar kimi film çəkmək istəyirdi. Lakin Fəqan
çəkilməsini arzu etdiyi filmin baş rolunu məhz özü oynadı.”
Bəli, Fəqan vətənini
canından çox sevirdi, Fəqan öz ölümü ilə ölümsüzlüyə qovuşa bildi. İllər keçəcək,
işğaldan azad olunan torpaqlarda həyat öz axarına düşəcək və Qarabağ döyüşlərinə
həsr olunmuş filmlər çəkiləcək. Mən inanıram ki, o filmlərdən birinin süjeti Fəqanın
göstərdiyi qəhrəmanlığa həsr olunacaq. O film mütləq çəkiləcək. Çünki, gələcək
nəsil vətənpərvərliyi, yüksək insani keyfiyyətləri belə qəhrəmanlarımızdan öyrənməlidirlər.
Fəqan kimi yüzlərlə qəhrəman
döyüşçümüz “təki vətən sağ olsun” deyərək şəhidlik zirvəsinə yüksəldi. Ölümündən
sonra Fəqan Prezidentin sərəncamı ilə “Vətən uğrunda” medalı ilə təltif olunub.
Rahat yat, şəhidim. Sən ürəklərdə yaşayırsan!
Elmira Mehdiyeva
