Agentliyin dəstəklədiyi layihədə məqsədimiz

müharibə iştirakçılarını maarifləndirməkdir

“Yeni Fikir ” Jurnalist Həmrəyliyi İctimai Birliyi  QHT-lərə Dövlət Dəstəyi Agentliyinin maliyyə dəstəyi ilə “Müharibə iştirakçılarının dövlətin sosial siyasət sahəsindəki   qanunvericiliklə bağlı  maarifləndirmə təşəbbüsləri” layihəsinin həyata keçirilməsinə start vermişdi.  Layihə 01 mart 2023-cü ildən 31 may 2023-cü ilə kimi Zaqatala, Balakən və Qax inzibati rayonlarında həyata keçiriləcəkdir. Layihənin məqsədi şəhid ailələri, qazilər və müharibə veteranlarının hüquqlarının qorunmasına təkan olmaq, bu təbəqənin təmsilçilərinə yönələn dəstək xarakterli fəaliyyət barəsində onlara ətraflı məlumat vermək, çatışmazlıqları şəffaf şəkildə göstərməkdir.  Müharibə iştirakçılarının hüquqlarını, imtiyaz və qanuni mənafelərini qorumaq,onlar arasında ünsiyyət və əlaqəni möhkəmləndirmək, gənclər və yeniyetmələr arasında milli vətənpərvərlik tərbiyəsini gücləndirmək əsas məqsədimizdir. Bu  məqsədə çatmaq üçün hər üç rayonda maarifləndirici tədbirlər həyata keçiriləcək. Bu tədbirlərdə daha çox müharibə iştirakçısının, veteranların, qazilərin, şəhid ailələrinin iştirakının təmin olunması bir vəzifə kimi qarşıya qoyulub.

Layihənin hədəf qrupu I Qarabağ müharibəsində və Vətən Müharibəsində şəhid olanların ailələri, qazilər və veteranlar, onların ailələridir. İştirakçıların yaş həddi yoxdur, əsasən isə 18-40 yaş arası nəzərdə tutulub. Layihədən Zaqatala, Balakən və Qax rayonlarının müharibə veteranları və qazilər faydalanacaqlar.  180 nəfər marifləndirici tədbirlərdə iştirak edəcək.

Gözlənilən nəticələr isə belədir; müharibə iştirakçıları öz hüquqlarını, imtiyaz və qanuni mənafelərini daha yaxşı biləcək, Vətən müharibəsi iştirakçılarının bilik və bacarıqları artacaq, Vətən müharibəsi iştirakçıları arasında ünsiyyət və əlaqə möhkəmlənəcək, gənclər və yeniyetmələr arasında milli vətənpərvərlik tərbiyəsi güclənəcək, Şəhid ailələri və müharibə əlillərinin sosial problemlərinin mediada  müzakirəsi, çap olunan materiallar da minlərlə oxucunu maarifləndirəcək.